Ini adalah penggaan kisah perang Bharatyudha saat prabu Duryudana maminta kepada Parbu Salya menjadai Senapati panglima perang melawan Pandhawa.
 |
| Prabu Salya |
Nahanta Sri Nalendra...
Tedhak siniwaka ing sitinggil...
Sigra lenggah ing dampar kencana...
Iingkang kapipit pinatik mawa retna...
Sesemek'anira ingkang babut prangwedani...
Ooooo....
Rep tidhem permanem tan ana sabawane...
Walang myang awisik kang kapyarsa mung swarane...
Ooooo..
Abdi kriya gendhing myang samya nambut kardi...
Saya amimbuhi asri seneng jroning panangkilan...
Sang Nata alon manabda....
Ooooo...
****
Duryudana: Duh Kanjeng Rama Prabu...
Sewu lepat nyuwun gunging pangksama..
Sowan kula ing Ngarsa paduka menika namung bade pasrah bongkok'an...
Keparenga paduka ndepani barisan Kurawa mbenjang enjang, Rama...
Salya: Ngger Anak Prabu Duryudana...
Duryudana: nggih Rama, wonten dawuh...
Salya: Kula punika tiyang sampun sepuh..
Sampun sami kendho...
Bebayu sampun nglokro..
Lha kog kedhapuk dados Senopati menika, napa mboten klentu Ngger..??
Lak nggih kathah ta, agul-aguling negari Ngastina ingkang tasih enem kados ta Aswatama, ingkang tasih rosa, dada bahu tasih sentosa Ngger...
Duryudana: duh Rama Prabu, Aswatama samangke sampun kula tundhung saking Kurusetra...
Kesah dateng pundi kula mboten mangertos, Rama...
Salya: hhmm...
Kula menika tiyang sepuh..
Awon-awon kula menika jejering Ratu...
Lha kog namung dipun sepele'aken kalian bocah wingi sore, ingkang drajadipun namung prajurit magangan...
Serik manah Kula Ngger...
Duryudana: umpama paduka mentala kalian pejah gesang kula, inggih mangga...
Mugia paduka enget dateng putra paduka, inggih pun Yayi Ratu Banowati...
Kamangka putra paduka ingkang sanesipun, Burisrawa, Rukmarata, dalah Kang Mbok Surtikanthi sampun sirna margalayu...
Namung Kang Mbok Erawati lan Yayi Banowati...
Rama, wurung mboten wurunga, kula tetep bade mengsah pabaratan...
Mangka mestinipun Kula mesti pejah..
Rama, kula bade nderek titip Yayi Banowati, mugia tansa pinaringana pangayoman....
Salya: jagad dewa Bathara...
Saya tuwa kabotan pakaryan iki...
Ewuh rasa jroning kalbu...
Ngadepi ing kahanan...
Saya kuwur mring adil lan angkara...
Bener luput mung setipis kulit ari..
Tansah njagi aji diri....
****
Rikala semana, datan kapireng ing sedaya sami seba...
Begawan Bagaspati paring sabda mring Prabu Salya....
****
Bagaspati: Eee... Eee... Eee..
Ngger Narasoma...
Perang Brantayudha iku perang suci..
Sapa nandur bakal ngunduh, sapa gawe bakal nganggo...
Eee...
Candabirawa bakal pisah saka anggamu, ora beda klawan lelakonku...
Pisahing pupuh, kaya dene pisahing sukma saka anggane...
Candabirawa bakal bisah, saka Satriya ingkang handarbeni Ludira Seta...
****
Bumi gonjang-ganjing langit kelap-kelap katon....
Lir kincanging risang maweh gandrung...
Ooooo...
****
Salya: Eehh, jagad wasisaning Bathara...
Inggih, Botbotipun Kula menika nitipaken pun Anak Kula Banowati....
Mboten ketang ngigemi tembung, kucem-kucem di raupi, mbenjang enjang mlethek'ing surya, pun Bapa sagah madeg Senopati Agung Ngastina, Ngger...
Duryudana: aduh Rama Prabu, kula ngaturaken gunging panuwun, awit Rama kersa madeg Senopati Agung Ngastina, Rama...
Salya: inggih...
Rehning wekdal sampun lingsir dalu, suwawi kula derek'aken paduka kundur rumiyin dateng Kurusetra, Ngger...
Duryudana: Rama Prabu, menapa mboten sak menika kemawon paduka tindak dateng Kurusetra..
Sumangga Kula derek'aken...
Salya: mboten Ngger, Kula bade pamit kalian keng Ibu rumiyin Ngger....
Duryudana: inggih, menawi mekaten, keparengaken rumiyin Kula wangsul dateng Kurusetra, Rama...
Salya: inggih, suwawi Ngger, kula derek'aken....
No comments:
Post a Comment