Cerita Pewayangan Salya Gugur

 Salya Gugur
Ini adalah kisah pewayangan yang menceritakan saat-saat menjelang gugurnya Parbu Salya oleh Nakula dan Sadewa. Kisah ini adalah penggalan dari kisah Bharatayuda

Wayang Prabu Salya

Asri tinon ing pasewakan..
Busana sutra maneka...
Serbak puspiteng udyana...

Ooooo....

Myang panjrahing sarwa retna...
Renggang manik nawa retna..
Abra prabanya sumirat....
Gebyaring teja liweran....

Ooooo...
****
Salya: Waha, putraku Ngger Kembar...

Nakula/Sadewa: Duh Wa Prabu, kula ingkang sowan Wa Prabu...

Salya: Iyaa kulup Kembar Putraku Ngger...
Pada raharja tekamu...??

Nakula: Saking pamuji paduka lampah kula, tansah kawengku ing karaharjan satemah manggihi widada nir ing sambikala Wa Prabu...

Sadewa: Sembah pangabekti kula kunjuk wonten sak ngandhaping pepada, Wa Prabu...

Salya: iyaa Ngger, pangabektimu ingsun tampa, puja pangastuti mara gage tampanana Kembar..

Nakula: Kula tampi kanthi asta kekalih, kula pundi ing mustaka, kula lebetaken dada, mugia ndadosaken jejimat kagem gesang kula Wa Prabu...

Sadewa: Duh Wa Prabu, Kula kekalih nyuwun pejah mawi asta paduka...
Tinimbang Kula nyumerepi pra kadang kula, kilang-kilang kunarpane...
Pandawa mboten bade kuwawa bilih ngembari kridha paduka ing pabaratan, Wa Prabu...
Kanjeng Wa Prabu Salya sakalangkung mandraguna klawan sekti...
Pramila, pejahana Kula Wa Prabu...

Salya: Hhmm....
Jagaaaddd...jagad dewa Bathara...
Hei, Kembar...

Kembar: Kula wonten dawuh Wa Prabu..

Salya: kowe bocah sak kloron kui, putraNe Prabu Pandu..
Sing kondhang minangka Singa-singane trah Barata...
Ingkang kaping pindho, Ibumu Madrim, yaa Adhiku, trah Mandaraka ingkang ora gampang mupus marang gubet ruwete kahanan...
Lha kog duwe anak gembeng kaya kowe ki kepiyee hhmm..??
Brantayudha Jaya Binangun kui perang pengadilane Ingkang Maha Kuwasa, ing kono bakal lumaku, sapa nandur bakal ngunduh, sapa gawe bakal nganggo...
Apa kowe lan kadang-kadangMu Pandawa wis tau nandur ala..??
Apa kowe sak kloron wis tau utang pati, hhmm..??
Mara-mara jaluk mati...
Durung-durung kog wis mupus, yen mbesuk Pandawa bakal tumpes...

Nakula: duh Wa Prabu, bilih di petung mawi nalar, sinten ingkang saget ngembari kridha paduka mbenjang ing pabaratan..
Kamangka Kanjeng Wa Prabu punika, sampun kondhang sekti mandraguna....

Salya: hehehe....
Kui to..
Yen kowe sak kloron ora lali, kae, sawangen Eyangmu Begawan Bisma lan Gurumu Begawan Durna...
Kurang apa digdayane sak klorone...
Nanging kaseser karo Mbak YuuMu Srikandhi, lan bocah wingi sore si Tristajumna...
Ora beda marang pun Wa, Ngger...
Mula, sesuk-esuk, yen pun Wa magut pupuh, kowe sak kloron aja wang-wang...
Kowe kudu netepi dharmaning kastrianMu Ngger...
Kog ketok rada mangu-mangu, arep do Matur apa kowe hhmm..??

Sadewa: Ananging, sinten ingkang kiyat nampi Ajian paduka, inggih aji Candabirawa, ingkang dayanipun ngedap-edapi Wa Prabu...

Salya: Aduh Ngger kembar....!!
Madriimm...Madrim...
Senajan sliramu wis ora ana, nanging wewayanganmu tansah nglega, tumitis ing Putra-putramu...
Aku ora bakal lali mrang panjalukmu, supaya ngayomi bocah sak kloron, Madrim....
Kembar...

Kembar: wonten dawuh Wa Prabu...

Salya: aja pada blereng marang gelaring lahir...
Aji Candabirawa iku dudu kekuataning Maha Kuwasa...
Mula ing sawijining mangsa bakal tumpes, marang sawijining titah ingkang handarbeni Ludira Seta...
Kembar, yen sesuk-esuk pun Wa magut pupuh, kadangmu Mbarep yaa Puntadewa supaya mapag kridhaning pun Wa...
Lan samengko, rungokna kang dadi sabdaku...
Rehne anak-anakku lanang wis pada gugur ing pabaratan, aku titip lan tak pasrahake kawibawaning Mandaraka marang sliramu, Kembar....
Wis, mengko ndak dadi kuatiring kadang-kadangmu, mula balio ing Hupalawiya..

Nakula: Nun inggih Wa Prabu,
Kula sak kembaran nyuwun pamit Kanjeng Wa Prabu...

Sadewa: nyuwun tambahing pangestu, Kanjeng Wa Prabu...

Salya: Iyaa, ingsun pangestoni Kaki....