Cerita Pewayangan Prabu Salya gugur

Cerita Pewayangan Prabu Salya gugur
Cerita ini menceritakan, saat perang Baratayuhuda dimana banyak tokoh Kurawa yang sudah gugur, salah satunya adalah adhipati Karna. Kemudian ditunjukklah Prabu Salya menjadi panglima perang

Leng-leng ramya nikang sasangka kumenyar....
Mangrengga rum ning puri...
Mangkin ta pasiring halep ikang umah mas..

Ooooo...

Lwir murub ing langit tekwan sarwa manik...
Tawingnya sinawung saksat sekar ning suji....
Ungwan Banuwati yanamrem mwang nata Duryudana...

Ooooo...
****
Duryudana: jagad dewa Bathara...
Barisanku saya dina sana nipis...
Saya nipis...
Andel-andelKu, yaa Senopatiku...
Para manggala yuda pada mretheli...
Tumpes tapis tanpa tilas...
Kados pundi menika, Rama ing Mandaraka..??
Menika luput kula, punapa suku bahu kula..??

Salya: sareh, Ngger Anak Prabu, kula aturi sareh...
Wonten ing kawontenan punika, mboten wonten ginanipun bilih paduka Anak Prabu tansah metani, pundi ingkang luput, utawi sinten ingkang salah...

Aswatama: Nuwun sewu Sinuwun, kepareng kula bade matur saklimah babagan gelaring perang, ingkang mahanani guguripun Adipati Basukarna..

Duryudana: Aswatama, kowe arep matur apa..??

Aswatama: Nuwun sewu Sinuwun, saben-saben Senopati Kurawa ingkang majeng perang tansah kawon, amargi ing Ngastina wonten mata pitayanipun Pandawa, ingkang tansah nggrogoti kekiyatanipun Kurawa...

Duryudana: Aswatama...

Aswatama: wonten dawuh, Sinuwun...

Duryidana: Kowe kui Anak pandhita..
Mula kandhamu kudu jujur...
Yen iyaa yaa iyaa..
Yen ora yaa oraa...

Aswatama: duh Sinuwun, kula mboten silih netra...
Rikala Sang Basukarna menthang gandewa, ngeker jangganipun Janaka, kadadak kereta kagenjot kusir..
Satemah warastra miber ngengingi gelung rikma pun Janaka..
Sampun cetha, bilih keng Rama ing Mandaraka punika, minangka mata pitanipun Pandawa...

****
Dhadha muntap lir kinetap duka yayah sinipi...
Jaja bang mawinga wingis...

Ooooo...

Kumedhot padoning lathi..
Netra kocak mangondhar andhir..
Kerot-kerot kanang waja...
Idepnya mangalacakra....

Ooooo....
****
Salya: Aswatama...!!!!
Drajadmu wong cuplik murang tata...
Asor temen martabate...
Tanpa guna ucapmu..
Ora bakal ingsun ladeni...
Anak Prabu Duryudana...
Duryudana: Wonten dawuh Rama Prabu...
Salya: Kula nedya wangsul ing Mandaraka..
Bade ngedhem penggalih sawetawis...
Bilih sampun redhem manah Kula, kula wangsul ing kurusetra malih..
Sampun, kula nyuwun pamit Ngger Anak Prabu...
Duryudana: heh, Aswatama...!!!
Aswatama: Kula wonten dawuh, Sinuwun...
Duryudana: kowe wong cubluk landhep dengkul, keparat...
Sing tak gadhang-gadhang, sing tak jago-jago madeg Senopati, ora ana liya kejaba mung Kanjeng Rama Prabu Salya...
Bareng kowe langap-langap wadul perkara sedane Kakang Adipati Basukarna, banjur saiki penjenengane mutung, kundur ing Mandaraka..
Endah-endah wong tumprung, nglesot, ora gawe pepadhang, malah gawe kahanan saya butheg...
Ora minggat, kepruk gendhaga pecah ndasmu, keparat..!!!
Sengkuni: Kula aturi sareh Sinuwun....
Duryudana: Paman Harya, mapan marga kang utama..
Mrih Rama Prabu Salya kersa magut yuda, mandegani barising Kurawa, saguh dadi Senopati...
Ngrabasa barising Pandawa..
Sengkuni: Nun inggih Sinuwun, prayoginipun dipun susul kemawon, supados perkawis inggal padhang...
Duryudana: Wis, ora usah kesuwen..
Ayoo, enggal derekno ingsun, sowan ing ngarsanipun Rama Prabu Salya ing Mandaraka..
Sengkuni: mangga-mangga, kula dherek'aken Sinuwun...