Jejer Pewayangan Prabu Jayamurcita Nglamar Wara Sembadra seri 2

Jejer Pewayangan Prabu Jayamurcita Nglamar Wara Sembadra seri 2

Ini adalah kisah tentang utusan dari negara plangkawati yang menyampaikan surat lamaran dari rajanya Prabu Jayamurcita, yang hendak melamar Wara Sembadra yang tak lain adalah istri dari Raden Arjuna dan sedang mengandung 7 bulan.

Tan samar pamoring sukma sinukmaya...
Winaweng asepit...
Suminten telenging kalbu pambukaning warana...
Ooooo...
***
Gumaregel pangraosing sang Arjuna dupi maosing surasaning nawala ingkang dipun tampi saking Prabu Jayamurcita ing Plangkawati lumantar Prabu Karnadi..
Sumadya mijiling pangandika sang Arjuna...
***
Arjuna: Sinuwun Prabu Karnadi...
Karnadi: inggih, wonten dawuh...
Arjuna: mboten nyana bilih kados mekaten surasanipun nawala..
Karnadi: Raden, Kula sekedik kemawon mboten mangertos surasanipun nawala...
Sumangga Kula aturi ngendika, Raden..
Supados cetha anggen kula lumarap ing Ngarsa jengandika, Raden Arjuna..
Arjuna: Kisanak, Sang Nata Prabu Jayamurcita ing suraosing nawala, ing kalenggahan menika dereng nggadahi Prameswari..
Kamangka kiyambak'ipun sanget kepingin jinajeran Prameswari...
Saingga penjenenganipun lajeng utusan dateng jengandika sowan dateng Ksatriyan Madukara, supados nglamar dateng bojo kula pun Wara Sembadra supados kersa dados garwa Prameswari pun Prabu Jayamurcita....
Ewuh dateng kula bade caos wangsulan bilih pun Sembadra saweg wewegwaja sapta candra ing dinten samangke..
Sumangga kula nyuwun iguh pertikelipun saking jengandika Sang Prabu Karnadi, supados mboten ngantos dados daredah antawisipun Prabu Jayamurcita lan Raden Arjuna...
Karnadi: Oo dados, nawala menika wau supados nglamar daten keng garwa pun Wara Sembadra..??
Arjuna: kasinggihan mekaten...
Karnadi: waduh haduuhh...
Nyuwun pangapunten saestu lho Raden...
Kula mboten mangertos isinipun nawala...
Kula namung sadremi ngesto'aken dawuh pepunden kula pun Prabu Jayamurcita..
Inggih..
Lha samangke ngaten mawon...
Sareng jengandika sampun mboten kaget, mboten nggadahi raos duka dateng Prabu Jayamurcita, ateges penjenengan menika lila lair batos maringaken keng garwa..
Sebab bilih kula wangsul mboten angsal damel, mesti bade dipun kethok jangga kula...
Pramila kula suwun supados kula saget mboyong keng garwa dateng negeri Plangkawati..
Arjuna: kamangka Wara Sembadra saweg wewegwaja sapta candra...
Karnadi: bab menika gampil...
Wonten ing negari kula kathah dukun ingkang saget ngedalaken bayi saking guwa garba ingkang dereng titi wancinipun...
Menawi wonten negari kula menika naminipun, Aborsi..
Mangkih dipun tok'aken, lajeng dipun pendhem Urip-uripan, supados ing mangke sampun ngantos ganggu bebrayanipun pun Wara Sembadra lan Prabu Jayamurcita..
Kresna: Kaka Prabu...
Baladewa: Menengo kowe, rasah melu-melu...
Iki dadi jalaran iki..
Menungsa ora tatanan...
Manusmaning dajalaknat gegalah-gelahing sukertaning bawana iblis..!!!
Lagi sepisan iki aku kepethuk Nalendra sing jiwane kepanjingan iblis...
Mangka bocah ora duwe luput kog arep di gugurake kui, iki menungsa apa setan iki..??!!
Karnadi..!!
Karnadi: wonten dawuh..
Penjenengan..??
Baladewa: aku Baladewa, sing mok unekne ora pati kondhang mau...
Kowe utusane Prabu Jayamurcita kanggo nglamar bojone adhiku lanang Raden Arjuna...
Apa Ratumu kui ora melek..!!
Ing ngatase jagad di gelar, wong lanang wenang milih, lha kog arep nggayuh wong duwe bojo kui Ratu gableg pikiran opo ora...??!!
Hhmm..??
Ing ngatase Wara Sembadra lagi meteng pitung sasi kog arep di gugurake kui, gableg pikiran opo ora...
Kowe meneh Ratu nganggo mekutha, nanging mekuthamu kui isine telek...!!!
Setan kowe..!!!
Kresna: Kaka Prabu..
Baladewa: kosik, menengo..!!!
Kresna: Oo inggih...

Baladewa: iki dadi jalaran iki...
Setyaki...
Setyaki: wonten dawuh...
Baladewa: tata-tata...
Setyaki: ngesto'aken dawuh..
Karnadi: lho, kula menika mboten rembugan kalian penjenengan..
Kula menika rembagan kalian Raden Arjuna..
Lha bilih Raden Arjuna menika maringaken, sareng paduka menika tinemunipun menapa...
Baladewa: lho, lekno mripatmu gatekno gobogmu, aku kakangne Wara Sembadra...
Kowe Ratu ora tau maca koran..!!
Kresna uga kakangne Wara Sembadra..
Wara Sembadra tinemune ragil..
Kowe arep mbubrahake bebrayane Wara Sembadra lan Arjuna, pada dene kowe nebak dadane Baladewa, iblis...!!
Karnadi: Woo Oo Oo..
Baladewa: Woo Oo Oo ndasmu kui..!!!
Aku weruh rupamu, kowe Ratu pancen sugih mblegedu, nanging jiwamu jiwa iblis, ora duwe rasa kamanungsan, bayi ora luput, arep di tokne saka guwa garba..
Nek kiwe pancen digdaya, ayoo, waton bisa nyempal pundak'e Baladewa, boyongen Wara Sembadra..
Langkahana bathange Baladewa...
Kowe ora bisa ngalahke Baladewa, tetep nggayuh Wara Sembadra, pada dene anguk Neraka Jahanam..!!!
Karnadi: elhoo...
Tegesipun penjenengan nantang kula..??

Baladewa: lho, wis kit mau..
Wis kit mau..!!!!
Kowe Ratu ora peka, ratu goblog, tak unek-uneke kowe meneng wae...
Apa kowe Ratu jirih getih wedi mati..??

Karnadi: Wonten pundi anggenipun bade ngecak'aken kadigdayan..??

Baladewa: Wuuaahh, bagus...!!
Bagus..
Kui sing tak karepake...
Metu njaba, nganti ora tak ingel-ingel githokmu, aja dundang Baladewa keparat kowe...!!!